తిరుపతిలో తప్పక చూడవలసిన ఆలయాలు - 1

తిరుపతి నడిబొడ్డున రైల్వే స్టేషన్ ఎదురుగా గోవిందరాజ స్వామి ఆలయం ఉంటుంది. ఈ ఆలయం నిర్మాణం తోనే తిరుపతి నగరం పుట్టుక ప్రారంభం అయింది.

దాదాపు వెయ్యి సంవత్సరాలకు ముందు రామానుజుడు ఈ ఆలయాన్ని నిర్మించి గోవిందరాజ స్వామిని ప్రతిష్టించాడు. గర్భాలయం లోని గోవిందరాజస్వామి విగ్రహం అనుకోని పరిస్థితులలో అప్పటికప్పుడు సున్నంతో తయారుచేయబడింది. అభిషేకం చేస్తే సున్నం కరిగిపోతుంది కనుక ఈ స్వామికి అభిషేకం ఉండదు. తమిళనాడు చిదంబరంలోని గోవిందరాజస్వామి ఆలయానికి, ఈ ఆలయానికి దగ్గర సంబంధం ఉంది.

ఈ స్వామి పక్కనే శ్రీ కృష్ణుడు పార్థసారథి స్వామి అవతారంలో కొలువై ఉంటాదు. నిజానికి ఈ ఆలయం ఈయనదే. అప్పటికే కొలువై ఉన్న పార్థసారథి స్వామి ఆలయంలో గోవిందరాజ స్వామిని ప్రతిష్టించాడు రామానుజాచార్యుడు. ఇందుకు నిదర్శనంగా పార్థసారథిస్వామికి ఎదురుగానే ధ్వజస్థంభం, బలిపీఠం ఉండదం ఈనాటికీ మనం చూడొచ్చు.

ఈ గోవిందరాజ స్వామి ఆలయ ప్రాంగణం చాలా విశాలంగా అద్భుతమైన కళాసంపదతో కొలువై ఉంటుంది. ఈ ఆలయ ప్రాంగణంలో అనేకమైన ఉపాలయాలు, మఠాలు ఉన్నాయి. చిన రఘునాథుడు అనే పేరుతో వెలసిన శ్రీరాముడు ఉన్నాడు.

ఈ ఆలయానికి ముందున్న మట్లి రాజుల చేత నిర్మాణం కాబడిన రాజగోపురం మహద్భుతమైనది. ఈ గోపురం మీద గొప్ప శిల్పాలు ఉంటాయి. ఆ శిల్పుల కౌశలం అశ్చర్యాన్ని కలిగిస్తుంది. ఈ గోపురం మీద అనేక శృంగార శిల్పాలు చెక్కబడిఉంటాయి. ఈ గోపురాన్నే గాలి గోపురం అని కూడా అంటారు. దీని కింద నిలబడితే వేగంగా వీస్తూ చల్లని గాలి మనలను తాకుతూ ఉండి ఎంతో హాయిని కలిగిస్తుంది.